چھوٹے بچوں کی مسجد وزٹ

چھوٹے بچوں کی مسجد وزٹ

محمد رضی الاسلام ندوی

          خواہش کی گئی کہ مرکز جماعت اسلامی ہند کی مسجد اشاعت اسلام میں کچھ چھوٹے بچے آئے ہوئے ہیں - انہیں کچھ دین کی باتیں بتادوں اور ان کے سامنے مسجد کا تعارف کروادوں - میں نے آمادگی ظاہر کردی -

          مسجد پہنچا تو دیکھا کہ تقریباً پچیس تیس بچے اور بچیاں موجودہ ہیں - ان کے ساتھ تین چار خواتین بھی ہیں - ان بچوں کی عمریں پانچ سے دس برس کے درمیان رہی ہوں گی -  معلوم ہوا کہ یہ بچے مختلف اسکولوں سے تعلق رکھتے ہیں - ایک NGO کے ذریعے ہر ہفتہ چھٹی کے دن ان کی دینی تعلیم و تربیت کا انتظام کیا جاتا ہے - بچے جمع ہوتے ہیں تو انہیں دین کی بنیادی باتیں بتائی جاتی ہیں اور کچھ عملی مشق بھی کروائی جاتی ہے - اس کے تحت آج ان کی مسجد وزٹ کروائی گئی ہے -

       میں نے بچوں کے سامنے مسجد کا مقام اور اہمیت ، نماز باجماعت کی فضیلت ، مسجد میں حاضری ، وضو کا طریقہ ، پنج وقتہ نمازوں کے احکام ، جمعہ کی فضیلت ، خطبہ جمعہ اور دیگر باتیں بتائیں - درمیان میں سوالات بھی کرتا رہا - یہ دیکھ کر بہت خوشی ہوئی کہ چھوٹے چھوٹے بچوں اور بچیوں نے میرے سوالات کے بالکل درست جوابات دیے - اس سے اندازہ ہوا کہ معلّمات نے بچوں کی تعلیم و تربیت میں خوب محنت کی ہے -

         یہ بہت اچھا پروگرام لگا - اس طرح کے پروگرام ہر بستی میں کرنے کی ضرورت ہے - بچپن کا علم پتھر کی لکیر ہوتا ہے - اس کے اثرات زندگی بھر باقی رہتے ہیں -

           بچوں کی یہ مسجد وزٹ کروانے والوں کو بہت بہت مبارک باد -