علم وعمل کا سنگم تھےولی بستویؒ

مفتی جمال احمد قاسمی بستوی مولانا ابوالکلام آزاد ایجوکیشنل اینڈ چیریٹیبل ٹرسٹ یوپی انڈیا

میرے ماضی کے افق پر یادوں کے جو ستارے تابندہ اور روشن ہیں ،ان میں میری ابتدائي تعلیم کا وہ دور بھی ہے جب دارالعلوم دیو بند میں میرا داخلہ ہوا ،وہیں ولی اللہ بستوی سے میری ملاقات ہوئی  ہم عصر ہم درس اور ہم وطن ہونے کی بنا پر روزبروز قربت میں اضافہ ہوتا گیا ،اور قربت آخرتک نہ صرف باقی رہی بلکہ اس کے بقامیں علم وعمل کے پیکر صدق ووفا کے حامل میرے مخلص دوست جنہیں آج مرحوم لکھتے قلم لرزاں ہے کا بڑا کردار رہا ،مولانا جب اپنے وطن آتے اس ناچیز غیرمعتبرکو اپنے آمد کی اطلاع ذات خودغریب خانہ پرتشریف لاکر شرف ملاقات سے نوازتےحضرت مولانا ولی اللہ صاحب رحمہ اللہ دارالعلوم دیوبند کے مائہ نازفاضل محدث مفسر ایسے عالم تھے جن کے فیوض وبرکات سے ایک عالم مستفیض ہوا ، تواضع ،انکساری، خوش اخلا قی، سخاوت ،ہمدردی کا مجسمہ تھے ایک با صلا حیت عالم ہونے کے ساتھ مرحوم کوشعروشاعری میں وہ مقام حاصل تھا کہ ((کہدو میر وہ غالب سے ہم بھی شعر کہتے ہیں ،، وہ صدی تمہا ری تھی یہ صدی ہماری ہے ))

یہ ذوق خدا داد زمانہ طالب علمی میں ہی پروان چڑھ چکاتھا، دارالعلوم دیوبند میں زمانہ طالب علمی میں میرے گھر سے انتہائی پر مسرت خط آیا جس میں بائیس سالہ ازدواجی زندگی کے بعد خالہ جان کے بچے کے ولادت باسعادت کا مزدہ تحریر تھا خط کے ذریعہ ہی معلوم ہواکہ بچے کا نام ،،مکرم ،،تجویز کیا گیا ہے ،میں خط پڑھ رہاتھا اور مولا نا ولی اللہ مرحوم میرے بغل میں میری چار پایٔ پر لیٹے تھے میں واقعہ بیان کرکے تہنئت نامہ لکھنے کی گزارش کی مولانا نے نام وغیرہ کی معلومات حاصل کرنے بعد فوراْہی ,,ابن اکرم  مکرم ہیں جلوہ فگن ،، مرحباحبا صالحہ کے للن ،، کہدیا  : آگے میں اہل خانہ کے نام لیتا اور ولی صاحبؒ ان  کو نظم کرتے رہے   بیٹھنے سےپہلے تیرہ اشعار کی نظم تیار تھی ،حضرت مولا نا ولی اللہ صاحب رحمہ اللہ اسم با مسمی ایک فرشتہ صفت انسان تھے  ایک طویل عرصہ تک مہاراشٹر کی مشہور دینی درسگاہ اشاعت العلوم اکل کواں  میں بحیثیت استاذ حدیث وتفسیر خدمت انجام دیتے رہے ادھر کچھ عرصہ سے عالم اسلام کی مشہورومعروف  درسگاہ مظاہر العلوم سہارنپور میں بحیثیت استاذ خدمت کررہے تھے کہ داعی اجل کی دعوت پر لبیک کہتے ہوئےاپنے مالک حقیقی سے جاملے اور یہ عالم فانی ایک سچےولی اللہ  سے محروم ہوگیا  دعاہے کہ اللہ رب العزت اپنے اس ولی کی مغفرت فرمائے اور جنت الفردوس ٹھکانا نصیب فرمائے۔

                                                                                                                                                                    

بس اتنی سی حقیقت ہے فریب خواب ہستی کی 

 کہ آنکھیں بند ہوں اور آدمی افسانہ بن جائے      

                                                                                                                                                                                                                                                                                                                                                                                                                                                                                                                                                                                                                                                                                                                     دعاگو: